Бир жолу бир адам психиатрга келип: “Доктор, мен жалгызмын, капалуумун, бактысызмын. Сиз мага жардам бере аласызбы?” – деген. Психиатр ага циркке барып, жалпынын пикири боюнча, атүгүл, өтө капалуу адамды да күлдүргөн белгилүү клоундун оюнун көрүүнү сунуш кылган. Бирок пациент антүүгө мүмкүн эмес экенин моюнуна алышы керек болчу. “Мен өзүм ошол клоунмун”, - деген ал.

            Университеттин студенти: “Мен 23 жаштамын. Көптөгөн кыйынчылыктарды баштан кечиргенден кийин жашоодон чарчадым”, - деген. Өткөн замандагы белгилүү грек бийчиси бир жолу мындай деген: “Жалгыз калганымда колдорум калтырайт, көзүмө жаш толот, жүрөгүм болсо буга чейин таппаган бакытка жана тынчтыкка катуу умтулат”.

            Дүйнө жүзүндөгү мамлекеттик эң улуу ишмерлердин бири мага мындай деген: «Мен карыямын. Мен үчүн жашоо маанисин жоготкон. Күнүм бүтүп, белгисиз жакка кетериме аз калды. Жаш жигит, сиз мага кандайдыр бир үмүт бере аласызбы?”

            Биздин материалисттик дүйнө бакыттын булагын издеп, алдыга умтулат! Билимге ээ болгон сайын, акылыбыз аздай сезилет. Экономикалык ийгиликтерге жетишкен сайын, көңүлүбүз чөгөт. Эс алуудан канааттануу алган сайын, жашоого ыраазы болбойбуз. Биз тынчы жок деңиз сыяктуубуз, тияктан бияктан бир аз тынчтык, бир аз канааттануу табабыз, бирок туруктуу канаттандырарлык эч нерсе таппайбыз.

            Ошентип, издөө улантылууда! Адамдар бийликке жана байлыкка ээ болуп, жашоодон ырахат алуу үчүн өлтүрүүгө, алдоого, кууланууга, уурдоого жана согушка жөндөмдүү. Алар ушундай жолдор менен тынчтыкка, коопсуздукка жана бакытка ээ болобуз деп ойлошот. Бирок ичибизде бир үн дайыма: “Бул сен каалаган жашоо эмес”, - деп айтып турат.

            Жашоону эң сонун кыла турган, биз каалаган бакыттын түбөлүктүү суулары агып жатканын билгенсийбиз. Биз качандыр бир кезде, кайсы бир жерден бакытка жол тапкандай болобуз, бирок анын бакыт эмес экенин билгенибизде көңүлүбүз кайт болуп бактысыз бойдон калабыз.

            Бизге жашообуздагы ар кандай шарттарга көз каранды болгон, үстүртөн болгон бакыт эмес, жашообузга бекем негиз боло алган бакыт керек. Биз жашоодогу кайгыруу, оор жагдайларда да жүрөгүбүздү кубанычка толтурган бакытты издейбиз.